編輯手記

歡喜迎新

編輯部

        時間過了真緊，已經閣進入新的一年矣，經歷風湧重重的2019年，由國際注目牽動經濟政治戰略的美中貿易戰爭，到香港反送中抗爭、澳洲共諜投誠事件、臺灣總統大選等等，一波接一波的衝擊，特別是佇今年1月11日，長期面對中國文攻武嚇，無所不至的干預之下，臺灣多數的人民共同以拍破歷來民選總統得票紀錄的超懸票聲，支持守護臺灣主權佮民主自由的蔡英文總統懸票連任，向全世界展現咱的尊嚴佮自信，宣告堅定的意志佮決心。佇遮，除了佮逐家鬥陣分享身為臺灣人的勇敢佮光榮之外，嘛歡喜佇新的一年迎接新的局勢、新的契機，對國家未來的展望，對本土文化的推捒（sak），包括濟濟文友所關心的語言政策，相信會當樂觀期待順利接紲（suà，續）發展，持續落實佮深化。

        民主自由平等從來就毋是憑空出現的，了解臺灣歷史的人應該攏有深刻的感受，咱恭喜蔡英文總統，也感謝伊為咱承擔，2020新年新氣象，祝逐家平安順序，萬事如意。

文化獎‧文學獎

        這期的公共議題方面，報導臺南年前舉行的兩个重要文化活動，一个是2019第八屆臺南文化獎，得獎人國立成功大學建築學系名譽教授傅朝卿，是文化資產保存的先行者，佇早期臺灣文資保存未受重視的時，傅教授毋但致力開創佮推動，而且長年參與臺南文化事務，積極奉獻專長，無論發揚、實踐、傳授、著作等各方面攏有高度的成就，對臺南城市發展影響深遠，咱祝賀伊，並紹介伊傑出的事蹟。

        閣一个是2019第九屆臺南文學獎，臺南市政府長期鼓勵文學創作、推廣寫作風氣，佮栽培人才建構在地的文學特色而舉辦的「臺南文學獎」，今年已經進入第九冬矣，參賽的作品總件數高達519件，是近年來上濟的一擺，會當講是文學豐收的年冬。其中，關於臺語文學的「臺語現代詩」佮「臺語短篇小說」的獎項，已經漸漸內化成做城市的文學特色之一，咱進前期刊登臺語現代詩首獎作品，詩人作家柯柏榮創作的《記持開始食餌--ah──詩寫外公陳 tsuë》，這期接紲刊登臺語短篇小說首獎，詩人作家王永成創作的《地獄谷》，邀請逐家做伙來欣賞、觀摩。

特稿佮專輯

        這期「王育德紀念專題系列」除了有詩人作家周華斌的《一番星ê傳說──送組成「台灣人元日本兵士補償問題思考會」ê王育德先生》，嘛邀約王育德博士的查某囝，目前擔任「台灣獨立建國聯盟」日本本部委員長的王明理女士參與，書寫《正月の準備‧二つの文化》，並委託成功大學陳麗君教授翻譯以日臺雙語對照呈現，予逐家品味無仝的國風、語言之間的趣妙。另外，臺文界的前輩洪惟仁教授所寫的《黃勁連先生个台語貢獻》，毋但寫出佮伊仝年的老朋友「勁連仙」──仝款是臺文界的先行者黃勁連老師，對臺語文濟濟的貢獻，包括各類的文學創作、民間文學、漢文研究……等多方面的成就，行句之間嘛引出近代臺語文學發展重要的進程佮觀念，會當予關心的朋友佮研究者做參考。

        當季專輯「為愛導讀」，各作者所紹介導讀的並無侷限佇臺文著作，除了臺文前輩沙卡布拉揚的台語長篇小說《霧城》以外，分別有《逝去的武林》、《約翰‧克利斯朵夫》、《文藝春秋》，以及徛佇殘障者的角度，感念鄭豐喜的作品所帶來的鼓舞佮啟示的《有愛無礙》。

        無仝的視角，會當看著無仝的風景，希望也帶予逐家無仝的體驗。