施炳華教授序：
褒歌是一般民眾佇咧勞動（採茶、划（kò）船、種作……）所唸唱的「土地之歌」。咧描寫人民實際生活的感受，文學技巧誠懸。台灣褒歌是「台灣國風」，可見褒歌文學的媠。
《石碇相褒歌》這本書會凍做挖掘台語古泉州音的寶貝，欣賞褒歌文學的媠，閣來聽老先唸唱褒歌的台語自然的語言音樂的媠。
講著褒歌的唸唱、收集，佇台灣上認真做、貢獻誠大的是林金城君。二十外年來伊佇台北地區──尤其是泉山腔區──逐跡去採集老褒歌先的唸唱，錄音、文字化、注音、解釋、出版，每一項攏愛有專業的智識、耐心、留傳民間歌謠的使命感，才會凍完成一本一本的褒歌集。
本書體例中的【賞析】，是褒歌文學上精彩的部分，由許亮昇老師說明。許老師學識豐富，文學素養誠懸，簡單四句的褒歌，減彩讀者看袂出其中的奧妙，透過許老師詳細幼膩的分析，徵引古今中外事例，予讀者體會著褒歌文學的媠。

洪惟教授：
真歡喜我个愛徒林金城先生佮許亮昇先生又閣出版一本褒歌集：
《石碇相褒歌》。
阮2002年出版《台北褒歌之美》以後，我著無繼續台北褒歌个調查研究，文化界也無人關心相褒歌个命運。雖然2000年起台灣人做總統，但是怹心中有客家山歌，並無北台灣、澎湖个相褒歌，無恆春个思雙枝（俗寫思想起）。臺灣个民間文學真歹命。
佳哉這幾年，金城佮亮昇兩个人手牽手，繼續調查、記錄、詮釋褒歌个媠，維持相褒歌研究个氣絲仔。以林金城為中心个團隊，出版《金山相褒歌》（2003）、《平溪相褒歌》（2004）、《桃園相褒歌》（2004）、《雙溪相褒歌》（2005）、《坪林相褒歌》（2012）五本冊。中間，金城佮亮昇去讀師大台語研究所，雖然學力有精進，毋過感覺學歷是次要个，家己个文化閣卡愛有人疼痛，所以逐家和齊（hō-tsê）閣倒轉來關心相褒歌這个歹命囝。
我提著這本歌集，袂輸抱著我个紅嬰仔金孫仝款，一面歡喜，一面目屎掛目墘，心肝念講：「歹命孫，汝出世佇臺灣鶴佬民間文化衰頹、卑微个時代，毋知有外儕人卜疼惜汝。阿公老矣，著靠恁爸--佮您叔--仔共恁晟養大漢heh！」